आजच्या गतिमान जीवनात संस्कार कसे करायचे ही एक मोठी समस्या होऊन बसली आहे. आई-वडील, कुटुंबातील बहुतेक सदस्य हे सतत व्यस्त आणि कार्यरत असल्याने मुलांसाठी वेळ काढणे, त्यांच्याशी गप्पा मारणे, त्यांच्या प्रश्नांना उत्तर देणे हे फार अवघड झाले आहे. मुलांना गोष्टी सांगणे, कथा - कहाणी सांगणे हे तर अशक्य होत चालले आहे. शिवाय स्वतंत्र कुटुंब पद्धतीमुळे आजी, आजोबा, काका, काकी इत्यादी नातेवाईक मुलांच्या वाट्याला येणे हेही दूरावत चालले आहे. मुलांना गोष्टी सांगायच्या आहेत, त्यांच्याबरोबर गप्पा तर मारायच्या आहेत, त्यांच्यावर संस्कार करायचे आहेत, या सर्व गोष्टी करायची इच्छा तर खूप आहे परंतु वेळ मिळत नाही, ही समस्या आहे. याच बरोबर आई-वडिलांनाही अनेकदा रामायण, महाभारत, पंचतंत्र या ग्रंथांची फारशी ओळख नसते, हीही समस्या आहे. याचबरोबर आपल्या मुलांसाठी आपण सर्व काही करीत आहोत. परंतु आपल्या मुलांनीच भविष्यात आपल्याला नीट वागवले नाही तर काय करायचे अशी सूक्ष्म भीती कुठेतरी खोलवर अंत:र्मनामध्ये असते.

​

​

भीष्म स्कूल ऑफ संस्कार यांनी कथा संस्कार हा उपक्रम उपक्रम सुरू केला आहे. रोज रात्री ऑनलाईन माध्यमातून मुलांना गोष्टी सांगणे असे या उपक्रमाचे स्वरूप आहे. यामध्ये सुरुवातीला एक श्लोक, त्यानंतर गोष्ट आणि शेवटी प्रार्थना असे या उपक्रमाचे स्वरूप आहे. रोज रात्री झोपायच्या अधी गोष्ट ऐकून मग झोपी जायचे अशी कल्पना आहे. अर्थात मुलांबरोबरच पालक आणि घरातील इतर सर्व सदस्य या गोष्टी ऐकू शकतील, रामायण, महाभारत, वेद, उपनिषदे, पुराणे, हितोपदेश, पंचतंत्र इत्यादी ग्रंथातून या गोष्टी निवडल्या जाणार आहेत. अत्यंत सोप्या आणि रंजक शैलीमध्ये या गोष्टी सांगितल्या जाणार आहेत. मराठी आणि हिंदी भाषेमध्ये या गोष्टी सांगितल्या जातील. गोष्टी कशा प्रकारे सांगितल्या जातील त्याची नमुना गोष्ट आपल्या येथे क्लिक करून ऐकता येईल.